يا عيال

قال الذي يقرا بليا مكاتيب
ياللي تقرون العمى من عماكم

يا عيالي اللي تشرفون المراقيب
تريضوا لي واقصروا في خطاكم

خوذوا كلام الصدق ما به تكاذيب
مثل السند مضموم للي وراكم

ياعيال لا صرتوا ضيوف ومعازيب
ترى الكلام الزين ملحه قراكم

وترا السبابه من كبار العذاريب
وهرج البلايس ما يطول لحاكم

المذهب الطيب فهو مذهب الطيب
والمذهب الخايب يبور نساكم

يا عيال ما سرحتكم بالواهيب
يا عيال ما عمر المعزب ولاكم

يا عيال ما ضربتكم بالمشاعيب
ولا سمعوا الجيران لجة بكاكم

يا ما توليت القبايل تقل ذيب
من خوف لا ينقص عليكم عشاكم

ويا ما شربت السم من عرض ما جيب
يفز قلبي يوم يبكي حداكم

أحفيت رجليني حامل الواهيب
وخليت لحم الريم يخالط عشاكم

يا عيال دوكم لحيتي كلها شيب
هذا زمان قعود أنا في ذراكم

قمت اتوكأ فوق عوج المصاليب
قصرت خطانا يوم طالت خطاكم

عطوني القرضة عليكم مطاليب
عطوني القرضة جزى من جزاكم

لابد يوم ٍ عاوي ٍ دوني الذيب
بالقبر ما افرق طيبكم من رداكم

ما ني بفاضحكم وسط الاجانيب
باعمالكم يدرون كل اقرباكم

لو كان تدرون الردى والمعاييب
صرتوا مع المخلوق مثل خوياكم

خوالكم بالطيب تروي المغاليب
ولو تتبعون الجد محدٍ شناكم

وش علمكم يا تاركين المواجيب
حسبي عليكم هالردى وين جاكم

قصيتكم واسنت وادي سلاحيب
ولقيت بالسبخا مدافيق ماكم

يا عيال بعتوني بصفر عراقيب
ما هي حقيقة سود الله قراكم

يالله عسى اعماركم شمسها تغيب
يعتم قمركم ثم تظلم سماكم

يا علكم في حاميات اللواهيب
ياللي على الوالد خبيث ٍ لغاكم

شفت الجفا والحيف والغلب والريب
بضلوعكم لا بيض الله قراكم

عسى نساكم ما تحمل ولا تجيب
ولا حد من البزران يمشي وراكم

اخسوا خسيتوا يا كبار اللغابيب
اهبوا هبيتوا يقطع الله ضناكم